Bakıda BMT ilə Azərbaycan arasında Dayanıqlı İnkişaf üzrə Əməkdaşlığa dair yeni Çərçivə Sənədinin (2026-2030-cu illər) hazırlanması ilə bağlı Strateji Prioritetləşdirmə Seminarı keçirilib.
Tədbirdə iqtisadiyyat nazirinin müavini Səməd Bəşirli çıxış edərək ölkəmizin BMT ilə sıx əməkdaşlıq etdiyini, qlobal təşəbbüslərə fəal dəstək verdiyini vurğulayıb. Azərbaycanın COP29-a ev sahibliyi etməsi ilə bu münasibətlərin yeni səviyyəyə yüksəldiyi qeyd edilib. Ölkəmiz BMT-nin Dayanıqlı İnkişaf Məqsədlərini (DİM) qəbul edərək, 50-dən çox dövlət proqramı və strategiyanı DİM-lərə uyğunlaşdırıb, Azərbaycan BMT-nin Yüksək Səviyyəli Forumuna artıq 4-cü Könüllü Milli Hesabatını təqdim edib.
Bu il icrası başa çatacaq 2021-2025-ci illər üçün Çərçivə Sənədinin inklüziv artım, güclü institutlar, ətraf mühitin qorunması və gender bərabərliyi kimi 4 əsas prioriteti əhatə edir. Bu istiqamətlərdə BMT ilə birlikdə çoxsaylı layihələr icra olunub. Seminar çərçivəsində 2030-cu ilə doğru: Növbəti 5 il üçün Azərbaycanın Dayanıqlı İnkişaf Prioritetləri, COP29 Prezidentliyi tərəfindən irəli sürülmüş təşəbbüslərə və BMT-nin Ümumi Ölkə Təhlilindən irəli gələn əsas çağırışlara dair təqdimatlar edilib.
Bu barədə “Caspian Energy Media” İqtisadiyyat nazirliyinə istinadən xəbər verir.
