Energetika naziri Pərviz Şahbazov Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclasında iştirak məqsədilə Bakıda səfərdə olan Dünya Bankının Cənubi Qafqaz üzrə regional direktoru, xanım Roland Praysın rəhbərlik etdiyi nümayəndə heyəti ilə görüşüb.
Görüşdə Dünya Bankı ilə enerji sahəsində əməkdaşlığın hazırkı səviyyəsindən məmnunluq ifadə edilib. Bank tərəfindən Azərbaycanda ötürücü şəbəkənin gücləndirilməsi (AZURE) layihəsinə 173,5 milyon ABŞ dolları məbləğində kreditin ayrılması bərpa olunan enerji mənbələrinin şəbəkəyə inteqrasiyasına töhfə olaraq dəyərləndirilib. Bildirilib ki, ölkənin enerji sisteminə 2027-ci ilə qədər 2 QVt-dan çox, növbəti mərhələdə isə təxminən 700 MVt “yaşıl enerji” güclərinin inteqrasiyası planlaşdırılır.
Görüşdə, həmçinin Beynəlxalq Maliyyə Korporasiyası (IFC) ilə dənizdə külək enerjisindən istifadə sahəsində əməkdaşlıq çərçivəsində hazırlanan Yol Xəritəsinə toxunulub və hazırda enerji şirkətləri ilə həyata keçirilən tədbirlərdən danışılıb. Bu barədə “Caspian Energy Media” Energetika Nazirliyinə istinadən xəbər verir.
